រដ្ឋបាលខេត្តប៉ៃលិន

Pailin Province Administration
ស្វែងរក

អភិបាលខេត្តប៉ៃលិន ជម្រុញឱ្យអាជ្ញាធរគ្រប់លំដាប់ថ្នាក់ ត្រូវយកចិត្តទុកដាក់តាមដានចំពោះបញ្ហាសុខភាព និងជីវភាពរបស់ប្រជាពលរដ្ឋ

  • 344
  • ដោយ poeuninfo

ប៉ៃលិន៖ ឯកឧត្តម ផាន់ ចាន់ធុល អភិបាលខេត្តប៉ៃលិន និងជាប្រធានគណៈកម្មការប្រយុទ្ធនឹងជម្ងឹ COVID-19 បានជំរុញអោយអាជ្ញាធរមូលដ្ឋានគ្រប់លំដាប់ថ្នាក់ ត្រូវសហការជាមួយមន្ត្រីជំនាញពាក់ព័ន្ធ ដោយយកចិត្តទុកដាក់ ធ្វើការពិនិត្យ និងតាមដានសុខភាព ព្រមទាំងជីវភាពរស់នៅរបស់ប្រជាពលរដ្ឋ ពិសេសប្រជាពលករដែលទើបវិលត្រឡប់មកពីធ្វើការនៅក្រៅប្រទេសឲ្យបានល្អ ដើម្បីធានាបាន នូវការ​ទប់ស្កាត់ ការឆ្លងរីករាលដាលជំងឺកូវីដ ១៩ ពីខាងក្រៅមកចម្លងនៅក្នុងសហគមន៍។

ឯកឧត្តម ផាន់ ចាន់ធុល បានមានប្រសាសន៍បែបនេះ នៅក្នុងឱកាសអញ្ជើញដឹកនាំ ថ្នាក់​ដឹកនាំ មន្ត្រីជំនាញ ក្រុមគ្រូពេទ្យ និងអាជ្ញាធរមូលដ្ឋាន ព្រមទាំងក្រុមការងារ បន្តចុះសំណេះសំណាលសួរ​សុខ​ទុក្ខ និងផ្សព្វផ្សាយអំពីវិធានការបង្ការ និងទប់ស្កាត់ការរីករាលដាលជម្ងឺកូវីដ-១៩ នៅតាមខ្នងផ្ទះ នាថ្ងៃទី១៤ ខែមេសា ឆ្នាំ២០២០ ព្រមទាំង​ឧបត្ថម្ភ​ស្បៀង ដល់ប្រជាពលរដ្ឋដែលមានជីវភាពខ្វះខាត នៅក្នុង​ស្រុក​សាលាក្រៅ ខេត្តប៉ៃលិន ចំនួន ៧៥​គ្រួសារ បន្ទាប់ពីពួកគាត់រងផលប៉ះពាល់សេដ្ឋកិច្ចគ្រួសារ ដោយការផ្ទុះឡើងនៃជម្ងឺ Covid-19.

 ឯកឧត្តម ផាន់ ចាន់ធុល បានមានប្រសាសន៍លើកឡើងថា៖ បញ្ហាជំងឺកូវីដ១៩នេះ បានបន្តរាល​ដាលនៅទូទាំងសាកលលោក ដែលបង្ករអោយមនុស្សស្លាប់ជាបន្តបន្ទាប់ ដោយឡែកនៅប្រទេសកម្ពុជា​វិញ ជំងឺកូវីដ១៩នេះ ក៍នៅតែបន្តរកឃើញអ្នកឆ្លង ជាបន្តបន្ទាប់ គួរអោយព្រួយបារម្ភ ដូចនេះយើងទាំងអស់គ្នា​ត្រូវចូលរួមទប់ស្កាត់ការរីករាលដាលនៃជំងឺនេះ តាមរយៈការធ្វើអនាម័យជាប្រចាំ គឺលាងសម្អាតដៃនឹងសាប៊ូ ឬ អាល់កុល និងហូបស្អាត ផឹកស្អាត ពាក់ម៉ាស់ ក្រម៉ា និងមិនត្រូវនៅប្រមូលផ្តុំគ្នាច្រើននោះទេ។

ឯកឧត្តមអភិបាលខេត្ត ក៍បានក្រើនរំលឹកដល់ថ្នាក់ដឹកនាំមូលដ្ឋាន ត្រូវតែមានការយកចិត្តទុកដាក់​ត្រួតពិនិត្យសុខភាព និងត្រៀមបំរុងទុកស្បៀងអាហារសម្រាប់ផ្តល់ជូនពលរដ្ឋនៅក្នុងដំណាក់កាល ប្រយុទ្ធ​ប្រឆាំងនឹងជំងឺកូវីដ១៩នេះ  ហើយបើប្រជាពលរដ្ឋណា មានការសង្ស័យឆ្លងជំងឺកូវីដ១៩ សូម​រាយ​ការណ៍​ជាបន្ទាន់មកអាជ្ញាធរមូលដ្ឋាន ដើម្បីបញ្ជូនពួកគាត់ទៅធ្វើការព្យាបាលនៅមន្ទីរពេទ្យអោយ​ទាន់​ពេលវេលា។

សូមបញ្ជាក់ថា៖ ប្រជាពលរដ្ឋមានជីវភាពខ្វះខាតក្នុងស្រុកសាលាក្រៅ ដែលបានទទួលអំណោយ​ស្បៀងពីអាជ្ញាធរខេត្ត មានចំនួន ៧៥គ្រួសារ ក្នុងនោះឃុំស្ទឹងកាច់ ចំនួន ៤៨គ្រួសារ និងឃុំអូរអណ្តូង ចំនួន ២៧គ្រួសារ ដោយក្នុង ១គ្រួសារ ទទួលបាន អង្ករ ២៥គីឡូក្រាម ត្រីខ ១យួរ ទឹកត្រី ១យួរ និងទឹកអាលកុល សម្រាប់លាងសម្អាតដៃ ១ដប ផងដែរ។

ញ៉ឹប បូរី ប៉ៃលិន

អត្ថបទទាក់ទង