ព្រឹកថ្ងៃទី ២៤ ខែមីនា ឆ្នាំ២០២០ នៅសាលប្រជុំបញ្ជាការដ្ឋានកងរាជអាវុធហត្ថខេត្តប៉ៃលិន ឯកឧត្តម ឧត្តមសេនីយ៍ឯក ស៊ិន សូផាន្នី មេបញ្ជាការរង កងរាជអាវុធហត្ថលើផ្ទៃប្រទេស ទទួលជំនាញកសាងកម្លាំង តំណាង ឯកឧត្តម មេបញ្ជាការកងរាជអាវុធហត្ថលើផ្ទៃប្រទេស បានអញ្ជើញជាអធិបតីភាព ក្នុងកិច្ចប្រជុំផ្សព្វផ្សាយការងារសោធននិវត្តន៍ កងរាជអាវុធហត្ថ ទូទាំងរាជធានី ខេត្ត ដោយមានការអញ្ជើញចូលរួមពី ឧត្តមសេនីយ៍ត្រី វ៉ាន់ ណាឡុង មេបញ្ជាការកងរាជអាវុធហត្ថខេត្ត ព្រមទាំងនាយ នាយរងអាវុធហត្ថ ដែលមានការពាក់ពន្ធជាច្រើនរូបទៀត។ កិច្ចប្រជុំនេះដើម្បីផ្សព្វផ្សាយឱ្យយល់ជ្រួតជ្រាបអំពីការងារសោធននិវត្តន៍ ដោយអនុវត្តទៅតាមច្បាប់អនុក្រិត្យ ឬសេចក្កីប្រកាសរបស់ក្រសួងការពារជាតិ និងពង្រឹងសតិអារម្មណ៍កងរាជអាវុធហត្ថ ដែលដាក់ឱ្យចូលនិវត្តន៍ ធ្វើការវាយតម្លៃទៅលើលក្ខណៈសម្បត្តិដោយផ្អែកលើសមត្ថភាព សុខភាព និងឆន្ទៈ។
ឯកឧត្តម ឧត្តមសេនីយ៍ត្រី វ៉ាន់ ណាឡុង មេបញ្ជាការកងរាជអាវុធហត្ថខេត្តប៉ៃលិន បានជម្រាបជូនអង្គប្រជុំឱ្យដឹងថា៖ តាមច្បាប់យោធិនទាំងពីរភេទ ដែលផ្អែកតាមឋានន្តស័ក្កិ អាយុចំពោះយោធិនអាជីព ដែលមានវិន័យគុណសម្បត្តិ និងសមត្ថភាពការងារមានសុខភាពល្អ ឬ ជាអ្នកជំនាញឯកទេស ប៉ុន្តែដល់អាយុចូលនិវត្តន៍ អាចសុំបម្រើការងារបានមួយឆ្នាំម្ដង ដោយមានការយល់ព្រមពីរដ្ឋមន្ដ្រីក្រសួងការពារជាតិ និងមិនលើសពីប្រាំឆ្នាំនោះទេ។ ឧត្តមសេនីយ៍ត្រី វ៉ាន់ ណាឡុង ក៏បានបន្តទៀតថា៖ ចំពោះអ្នកដែលមានឈ្មោះត្រូវចូលសោធននិវត្តន៍ ត្រូវបានធ្វើការវាយតម្លៃ បើសិនជាមានសុខភាពខ្សោយ គឺត្រូវឲ្យគាត់ចូលសោធននិវត្ថន៍ តាមសំណូមពរ និងតាមការកំណត់នៃច្បាប់ ព្រោះគាត់មិនអាចបំរើការងារបានទៀតទេ ចំពោះ តួលេខនេះមិនមែនថ្នាក់ខេត្តជាអ្នកកំណត់ទេ គឺជាការកំណត់របស់ថ្នាក់ជាតិ ហើយចំពោះអ្នកដែលមិនទាន់ដល់អាយុចូលនិវត្តន៍ក៏មិនអាចស្នើរសុំបានដែល ក្នុងនេះមានពី ដំណាក់កាល ដំណាក់កាលទីមួយ គឺការវាយតម្លៃរបស់ថ្នាក់ខេត្តដោយមានការប្រជុំពេញអង្គពីសំណាក់ មេ បញ្ជការរង នាយសេនាធិការ នាយការិយាល័យជំនាញ។ ដំណាក់កាលទីពីរ គឺថ្នាក់ជាតិបានចុះមកត្រួតពិនិត្យវាយតម្លៃម្តងទៀត ចំពោះគោលការរបស់ថ្នាក់ជាតិគឺយើងមិនបានដឹងនោះទេ ឯកឧត្តម ឧត្តមសេនីយ៍ វ៉ាន់ ណាឡុង បានលើកឡើងថា៖ ចំពោះរូបលោកជាប្រធានអង្គភាព គឺលោកមិនចង់អោយមានអ្នកណាទៅណានោះទេតែនៅពេលដែលធ្វើការវាយតម្លៃ គឺត្រូវតែមានអ្នកជាប់និងអ្នកធ្លាក់ ចំពោះលទ្ធផលយ៉ាងណាសូមសំណូមពរមេត្តាយោគយល់ផងចុះហើយនឹងត្រូវប្រកាន់សាមគ្គីភាពផ្ទៃក្នុងល្អជាមួយគ្នាគ្រប់ពេលវេលាផងដែរ។
ឯកឧត្តម ឧត្តមសេនីយ៍ឯក ស៊ិន សូផាន្នី មេបញ្ជាការរង កងរាជអាវុធហត្ថលើផ្ទៃប្រទេស ទទួលជំនាញកសាងកម្លាំង តំណាង ឯកឧត្តម មេបញ្ជាការកងរាជអាវុធហត្ថលើផ្ទៃប្រទេស បានកោតសសើរដល់កងរាជអាវុធហត្ថខេត្តប៉ៃលិន ដែលមានស្នាដៃការងារល្អលើការការពារសន្តិសុខខេត្តមានសន្តិសុខល្អ និងសាមគ្គីភាពផ្ទៃក្នុងប្រកបដោយប្រសិទ្ធភាពខ្ពស់។ ឯកឧត្តមបានបន្តថា៖ បន្ទាប់ពីការត្រួតពិនិត្យដំណាក់កាលដំបូងរបស់អង្គភាពកងរាជអាវុធហត្ថខេត្ត នេះជាជំហានទី២ ដែលក្រុមការងារកងរាជអាវុធហត្ថលើផ្ទៃ ត្រួតពិនិត្យកម្លាំងដែលដល់អាយុចូលនិវត្តន៍ឲ្យមានសុក្រិតភាព និងរង់ចាំការសម្រេចពីក្រសួងការពារជាតិបន្ត និងអ្នកដល់អាយុត្រូវចូលនិវត្តន៍មានសិទ្ធិស្នើសុំនៅបម្រើការងារទៅតាមលក្ខខណ្ឌដូចជាពិនិត្យឃើញថា នៅមានសុខភាពល្អ សីលធម៌ល្អ ជាអ្នកបច្ចេកទេស និងជាជំនាញ ដែលអង្គភាពត្រូវការចាំបាច់ និង ពិនិត្យអនុញ្ញាតឲ្យនៅបម្រើការងារបន្ត។ ឯកឧត្តម ឧត្តមសេនីយ៍ឯក បានគូសបញ្ជាក់ថា៖ អ្នកដល់អាយុចូលនិវត្តន៍ទទួលបានកិត្តិយស មោទនៈភាព ការទទួលស្គាល់ពីក្រសួងការពារជាតិ ព្រមទាំងទទួលបានប្រាក់សោធន៍និវត្តន៍យ៉ាងទៀងទាត់ និងការលើកទឹកចិត្តផ្សេងៗជាច្រើនផងដែរ៕
ក្នុងថ្ងៃជាមួយគ្នាផងដែរ ឧត្តមសេនីយ៍ទោ ចាន់ សារិន នាយករង នាយកដ្ឋាន ក្រសួងការពារជាតិ បានដឹកនាំក្រុមការងារអញ្ជើញ ត្រួតពិនិត្យ លើការងារជំនាញ ដែលមានការពាក់ព័ន្ធ ពិសេសលើការងារគ្រប់គ្រងអចលនៈទ្រព្យផ្សេងៗ ប្រចាំឆ្នាំ២០១៨-ឆ្នាំ២០១៩ នៅបញ្ជាការដ្ឋាន កងរាជអាវុធហត្ថខេត្តប៉ៃលិន ដែលមានការអញ្ជើញចូលរួមលោកឧត្តមសេនីយ៍ត្រី វ៉ាន់ ណាឡុង មេបញ្ជាកងរាជអាវុធហត្ថខេត្តប៉ៃលិន បាន ដឹកនាំមេបញ្ជាការរង នាយរងសេនាធិការ ប្រធាន អនុមន្ទីរ នាយការិយាល័យ លើការងារជំនាញជាច្រើនរូបផងដែរ។
