ប៉ៃលិន៖ ថ្ងៃទី២០ ខែតុលា ឆ្នាំ២០១៩ ឯកឧត្តម ផាន់ ចាន់ធុល អភិបាលខេត្តប៉ៃលិន អមដំណើរដោយ ឯកឧត្តម ឃុន វណ្ណៈ សមាជិកក្រុមប្រឹក្សាខេត្ត ឯកឧត្តម ឃ្លោក នួយ អភិបាលរងខេត្ត និងក្រុមការងារ ព្រមទាំងសប្បុរសជន បានអញ្ជើញចុះសំណេះសំណាលសួរសុខទុក្ខ និងនាំយកគ្រឿងឧបភោគបរិភោគ សម្ភារៈប្រើប្រាស់ សំលៀកបំពាក់ ព្រមទាំងថវិកា ទៅឧបត្ថម្ភដល់កុមារកំព្រា និងម៉ែដោះ នៅមណ្ឌលកុមារកំព្រាខេត្តប៉ៃលិន ដែលស្ថិតនៅភូមិអូរតាពុកក្រោម សង្កាត់ទួលល្វា ក្រុងប៉ៃលិន ខេត្តប៉ៃលិន ។
ឯកឧត្តម ផាន់ ចាន់ធុល អភិបាលខេត្តប៉ៃលិន បានមានប្រសាសន៍លើកឡើងថា៖ រាជរដ្ឋាភិបាលកម្ពុជាក្រោមការដឹកនាំរបស់សម្តេចតេជោ សែន ជានាយករដ្ឋមន្រ្តី បានគិតគូខ្ពស់ដល់ក្មួយ ៗកុមារកំព្រា ដោយមិនអោយក្មយៗឯកោនោះឡើយ ហើយរាល់ការខ្វះខាតរស់មណ្ឌលកុមារកំព្រាគឺរាជរដ្ឋាភិបាលក៍ដូចថ្នាក់ដឹកនាំខេត្ត បានជួយឧបត្ថម្ភគាំទ្រ និងសម្របសម្រួលឱ្យកុមារមានជីវភាពល្អប្រសើរ ព្រោះថាក្មួយៗកុមារគឺជាទំពាំងស្នងឬស្សី ដែលសង្គមជាតិយើងត្រូវរួមគ្នាដោះស្រាយ។ ក្នុងឱកាសនោះផងដែរ ឯកឧត្តម ផាន់ ចាន់ធុល ក៍បានផ្តាំផ្ញើរដល់ក្មួយៗ ចៅៗ កុមារកំព្រាទាំងអស់ ត្រូវតាំងចិត្តខ្ពស់ក្នុងការសិក្សារៀនសូត្រ ឱ្យក្លាយខ្លួនជាសិស្សល្អ និងពលរដ្ឋល្អ ក្នុងការបន្តវេន ដើម្បីចូលរួមចំណែកកសាង អភិវឌ្ឍន៍ប្រទេសជាតិយើងឱ្យមានការរីកចំរើនសំបូរសប្បាយរុងរឿងទៅអនាគត់។
សូមបញ្ជាក់ថា៖ អំណោយដែលឧបត្ថម្ភដល់មណ្ឌលកុមារកំព្រារួមមាន៖ អង្ករ ចំនួន ៥០០គីឡូក្រាម ទឹកត្រី និងទឹកស៊ីអ៊ីវ ៨យួ ស្កស ២០កញ្ចប់ ឆ្នាំង ១០ ចាន ៥០ ធុងទឹកកកតូច ៥ ចានដែកធំ ៦ ខ្ទះធំតូច ៧ កន្ទេល ៥ កញ្ច្រែង ៨ កាំបិតតូចធំ ៧ កំសៀវទឹក ៣ និងឧបត្ថម្ភថវិកាដល់កុមារកំព្រារ ចំនួន ១៨នាក់ ក្នុងម្នាក់ ២ម៉ឺនរៀល សំលៀកបំពាក់ម្នាក់ ២កំផ្លេរ ម៉ែដោះ ៣នាក់ ក្នុងម្នាក់ ៥ម៉ឺនរៀល។